Gagana Sāmoa 'i le Iunivesitē - 'Aiseā?

Music credits Punialava’a Band - Vi'i O Le Kolisi O Samoa - Samoa College, Vaivase

​E aogā ‘i le a? fai mai ‘ia pei ‘o le toloa e lele ‘ae ma‘au ‘i le vai,
Po‘o fea lava o le lalolagi e o‘o i ai lo‘u ola taumafai
O ā suiga i le si’omiaga, suiga fa‘aletagata pe ‘ua maoa‘e fo’i so‘u iloa
E lē mafai ona ave’esea, pe galo i ola lo’u tagata Sāmoa.
O le ala lea o lo‘u pi‘i pi‘i ama pea ma fia fai so‘u sao,
Tele pe itiiti, e fia togi sa‘u ma‘a mo se manuia o tupulaga a taeao.
 
O la‘u gagana Sāmoa, o lo‘u lea igagatō mai le Atua,
Po‘o ā filosofia o le atamai, e tūmau pea e lē liua.
O le gagana e momoli ai le a‘oao‘ina ‘ia o‘o ifo ‘i le loto,
O le gagana e sufi a‘i tuā‘oi o lagona, soālaupule ai le ūtaga, ia lauama to’oto’o.
Pe suia foliga, fa’ai‘u palagi, tainane le vāogagana ‘ese’ese ma ona faigatā
E manatua Taē ‘i Atuā, e te tau‘ave pea mamalu ‘o au measina mai o tā tua‘ā.
O talitonuga ma tomai na tu‘u taliga a‘o lea ‘ua tapu‘e i a‘oa‘oga fa‘aonapōnei
E afeifei e ‘upu o le alofa ma le onosa‘i ‘auā ‘ua va‘ava‘alua ma le Talalelei.

​‘O ai la e taofiofia lou loto Sāmoa?
Lea ‘ua iloga ala o i’a i le Va’aomanū ma le utugā vai i le poto
Sāmoa e, o le i‘a ititiiti le igaga, ae na te ā‘ea āfu loloto
Ia lē toe tagitu‘i Taputūtagitele iā Faatulia‘upolu ina ua fasia,
Ne‘i pū mo‘omo‘o le va’ai i ō tātou loto ma agava‘a ona ‘ōmia lea i le vaiāgia.
Silasila ‘i le lalolagi i fafo, telē lou sao i lau gagana ma le aganu‘u
Avea ma faife’au, fōma‘i, faitulāfono, faaliliu‘upu, faiā‘oga, a ia ao pea le nu‘u
 
Galue i faletusi, falemata‘aga, leoleo, silisili le tausi ‘āiga, ‘ekālesia ma le atunu‘u
O le loto Sāmoa e alofa ma moe manatunatu, e matua i ai le tu‘u.
O le gagana e sa‘ili ai le lagimālie pe’ā lutaluta le tai i suiga ‘ua i ai,
Po ‘o Sāmoa ‘i fanua, pe fofoaivao‘ese, ia totō pea le ola taumafai.
E fa‘apei ona mitamita ‘i le ‘Olopeleki ma le afā mālosi a Uelegitone.
O se fa‘amemelo lea, ia poupou le tāua o lou iloa o oe, e lē o sa‘u tala ‘ole!
O nai motugā‘afa mai le matāmatagi e avagālimaa’i lo’u vala’auina mai le Matai.
Auā o lo ta nu‘u moni ta te fiafia e sa’ili mea e te manuia ai.